Gin-anunsyo sang Health Ministry sa Gaza nga naglapaw na sa 8,000 ka Palestinians ang napatay — kalabanan ang kababainhan kag kabataan — kasunod sang pagpang-atake sang Israel bilang pagtimalos sa Hamas militants.
Photo Courtesy: Mohammed Salem/Reuters
Ginakahangaw-an man nga magpadayon sa pagsaka ang numero sang patay samtang nga wala sang plano ang Israel nga mag-isol sa ila tuyo nga magpatigayon sang ground offensive.
Isa sa pinakaulihi nga target sang Israeli air strikes amo ang area sa Tal al-Hawa sa Gaza City kun sa diin nahamtang ang al-Quds Hospital nga puluy-an man sang 14,000 ka Internally Displaced Persons.
Una na nga nagpaandam ang Israeli army sa hospital administration nga magbakwit gilayon bangud ginapahayag nga bombahan sini ang premises. Ang latest air strikes ang nakatuga na sang halit sa mga parte sang ospital.
Ini nga ospital ang nagaakomodar man sang mga personnel sang Palestine Red Crescent Society, operating rooms, kag ambulance crews nga amo ang nagabulig sa mga residente sa northern Gaza Strip nga nagakasamaran.
Kasunod sini, nagpaguwa man sang statement ang United Nations health agency chief nga si Tedros Adhanom Ghebreyesus: “We reiterate – it’s impossible to evacuate hospitals full of patients without endangering their lives.” #
