Ginkumpirma sang Overseas Workers Welfare Administration (OWWA) nga naka-schedule na nga mag-abot diri sa Pilipinas sa masunod nga inadlaw ang bangkay sang duha pa ka Pinoy nga nalakip sa napatay sa Israel bangud sa pag-atake sang Hamas militants.
Sa Byernes, Nobyembre 3, magaabot sa pungsod ang bangkay ni Angeline Aguirre, ang Filipina nurse nga tumandok sang Binmaley, Pangasinan, nga napatay matapos ginpili sini nga indi pagbayaan ang iya tigulang nga pasyente apisar may kahigayunan pa kuntani ini nga magpalagyo sang nag-abot ang militante nga grupo sang Oktubre 7 sang aga.
Suno kay OWWA Administrator Arnell Ignacio, hatagan ini sang hero’s welcome kag gina-arrange na subong ang assistance nga ihatag sa pamilya lakip na ang pagpalubong sa iya.
Ginsiling naman sang Department of Foreign Affairs (DFA) nga magaabot sa Domingo, Nobyembre 5, ang bangkay sang Ilongga nga si Grace Prodigo Cabrera nga isa ka caregiver sa Kibbutz Be’eri sa southern Israel.
Tumandok si Cabrera sang Barangay Burak, Maasin, Iloilo. Nasapwan ang bangkay sini 12 ka adlaw matapos gindala sang Hamas sang ginpahayag nagpakitluoy pa ini nga indi lang pagtandugon ang iya tigulang nga alaga.
Nahibaluan nga magluwas kanday Cabrera kag Aguirre, may duha ka iban pa nga Filipinos nga napatay sa Israel nga amo sanday Loreta Alacre, 49 nga Negrense; kag Paul Vincent Castelvi, 42-anyos nga caregiver.
Na-repatriate sa Pilipinas ang bangkay ni Alacre sang tinalikdan nga mga semana, samtang gin-cremate naman si Castelvi sa Tel Aviv. #
