Ginkumpirma sang Presidential Communications Office (PCO) nga nag-resign ang film and television director nga si Paul Soriano sa iya posisyon bilang presidential adviser on creative communications.
Suno kay PCO Secretary Cheloy Garafil, kinahanglan ni Soriano nga pasulabihon ang iya nga “personal commitments” kag maghatag sang tyempo sa iya nga pamilya kag bag-ong bun-ag nga anak.
MALACAÑANG PHOTO
“Presidential Adviser Paul Soriano took a well-deserved break to spend time with his family and newborn daughter. He has since submitted his resignation to prioritize his personal commitments,” kabahin sang statement ni Garafil.
Sa subong, wala pa sang nagbulos sa iya nga posisyon.
Una nga nahinambit ang resignation ni Soriano paagi kay Senator Sonny Angara sa Senate plenary deliberations sa ginaduso nga 2024 budget sang Office of the President.
Hulyo sang nag-leave si Soriano sa wala man napaathag nga rason.
Gin-appoint siya sa amo nga posisyon sang Oktubre 2022 kag nangin kabahin man sang presidential delegations sa official overseas trips sang presidente.
Sa 2022 election campaign, todo-kampanya man ini para kay Marcos. Ang iya asawa nga si Toni Gonzaga amo ang isa sa pinakadaku nga celebrity campaigners sang presidente. #
