Ginaimbestigaran na sang Department of Education (DepEd) kag sang Philippine National Police (PNP) ang kamatayon sang duha ka high school students sa Taguig nga ang lawas pareho nga nakit-an sa sulod mismo sang ila eskwelahan.
Suno kay DepEd spokesperson Michael Poa, nagapakig-angot na ang schools division office sang Taguig City sa Scene of the Crime Operation (SOCO) agud padalman ang kamatayon sang grade 8 kag grade 10 students sang Signal Village National High School.
11:00 sang Byernes sang gab-i sang nasapwan ang lawas sang duha ka mga biktima nga lunsay mga babayi.
Sandig sa inisyal nga imbestigasyon, nasapwan ang duha nga nagabitay sa steel grill sa sulod sang Girl Scout Mini Office sa 3rd floor sang eskwelahan.
Ginpahayag nga antes ang ‘las otso sang amo nga gab-i, ulihi nga nakit-an nga buhi ang duha ka teenagers kag nagsiling pa sa ila classmates nga magapauli na sila apang natukiban sang ulihi nga wala ang mga ini nakaabot sa ila nga balay.
Nagahingyo man ang himata sang isa sa mga biktima nga magpanugid na ang classmates, manunudlo, kag mga abyan kun may nahibaluan sila sa kamatuoran sa likod sang amo nga hitabo.
Sandig naman sa inisyal nga impormasyon sang Taguig City police, wala sang foul play nga nakit-an sa amo nga insidente.
Nagpasalig ang Taguig City government sang “full support” sa pamilya sang mga biktima samtang nagmandu naman si Mayor Lani Cayetano sang maid-id nga imbestigasyon.#
