Nalakip ang isa ka Pinoy sa grupo sang hostages nga ginhilway sang militante nga grupo sa una nga adlaw sang ceasefire sa tunga sang Hamas kag Israel.
Suno sa International Committee of the Red Cross kag foreign ministry sang Qatar, 24 tanan ka mga bihag ang gin-release sang Hamas militants kun sa diin 13 diri ang Israelis, 10 ang Thai citizens kag isa ka Filipino citizen.
Ginkumpirma naman sang Israel Defense Forces nga yara ang hostages sa Israel kag ginpaidalom sa initial medical assessment.
Nahibaluan nga 50 ka hostages ang ginalauman nga buy-an sang Hamas sa sulod sang apat ka adlaw nga ceasefire.
Sa rekord sang Department of Foreign Affairs (DFA), duha ka Pinoy ang missing sa amo nga giyera sa Middle East kag ginapatihan nga bihag sang militante sa Gaza.
Sa inisyal man nga impormasyon, ang ginhilway na nga Pinoy amo si Jimmy Pacheco, 33, amay sang tatlo ka kabataan, kag isa ka caregiver nga gin-hostage sang nag-atake ang Hamas sang Oktubre 7 sang kaagahon.
Nagatrabaho si Pacheco sa Nir Oz kun sa diin iya ginatatap ang 80-anyos nga tigulang. Ang Nir Oz isa ka komunidad sang 400 ka mga tawo nga nahamtang tres kilometros ang kalayuon halin sa border sang Gaza.
Sang tion nga nagsalakay ang Hamas, ginpahayag nga nakatawag pa ini sa iya nga mga abyan nga gindala siya sang militante nga grupo kag ginpatay ang iya nga alaga. Pagkasunod nga adlaw, naglapta na ang video sini nga nakaposas kag ginkarga sang Hamas sa isa ka salakyan.
Ginpahayag nga nagatrabaho ini sa Israel sa sulod sang lima ka tuig kag apat ka tuig naman sini nga ginatatap ang iya alaga antes natabo ang pagpang-atake sang Hamas.
PALESTINIAN DETAINEES
Bilang kabaylo naman sang 24 ka mga hostages nga ginbuy-an sang Hamas, gin-release man sang Israel ang 39 ka Palestinian detainees.
Ini nga mga indibidwal ang gin-akusahan sang nagkalain-lain nga mga sala– halin sa pagpanghaboy sang mga bato pakadto sa attempted murder.
Convicted na ang iban sa ila samtang ang iban naman ang nagahulat pa sang trial.
Ini nga detainees nga ginabug-usan sang 24 ka mga babayi kag 15 ka mga solterito ang gindala sa Beituniya checkpoint sa West Bank.
Suno sa prison service sang Israel, pahanugutan na sila nga makapauli.
Sa pihak nga bahin, ginreport naman sang UN Office for the Coordination of Humanitarian Affairs nga sa una nga adlaw sang ceasefire, 200 trucks ang na-dispatch halin sa Nitsana pakadto sa Rafah crossing, samtang 137 trucks naman sang goods ang napasulod na sa reception point sa Gaza nga amo ang pinakadaku nga convoy sang ayuda halin sang natabo ang inaway sang Oktubre 7. #
