Nagahingyo sang maid-id nga imbestigasyon ang pamilya kag mga abyan sang 39-anyos nga public school teacher nga ginbuno-patay sa Tacloban City.
Ginkilala ang biktima nga si Bernabe Basiano, isa ka faculty member sang Antonio Balmes National High School sa Barangay 103-A Paglaum sa amo nga syudad.
Photo: Teodora Gaces Asis
Sandig sa inisyal nga impormasyon nga ginpaguwa sang Police Regional Office (PRO)-Eastern Visayas, nasapwan si Basiano nga madamo sang pilas sa iya liog pasado ‘las tres sang hapon sang Sabado sa isa ka bakante nga balay sa Knightsbridge Village, Barangay 98-Camansihay, Tacloban.
Suno sa pulis, mabisita kuntani ang tag-iya sa iya nga balay agud nga tinluan ini apang pagkabukas sang puertahan, nakit-an nga may nagalalapta nga dugo sa salog kag nagahuray-ad man ang biktima.
Nagpaguwa man sang statement ang Department of Education Eastern Visayas nga naga-kondenar sa amo nga krimen. #
