Nadakpan sang United States Navy ang armado nga kalalakinhan nga nagtuyo nga ma-hijack ang isa na naman ka barko sa kadagatan nga sakop sang Middle East.
Ini nga Liberian-flagged chemical tanker ang una na nga ginhingadlan nga Central Park, may karga nga phosphoric acid halin sa port sang Safi sa Morocco, kag gina-manage sang Zodiac Maritime nga isa ka international ship management company nga naka-base sa London kag kabahin sang Zodiac Group sang Israeli billionaire nga si Eyal Ofer.
Zodiac Maritime via New York Times
Lakip sa crew sang amo nga tanker amo ang Russian, Vietnamese, Bulgarian, Indian, kag Georgian nationals kag may yara man sang duha ka Filipino seafarers samtang Turkish naman ang kapitan.
Suno sa US Central Command, sang yara na ang barko sa Gulf of Aden, nagpangayo sang bulig ang crew bangud may naga-atake sa ila.
Nag-responde gilayon ang guided-missile destroyer nga USS Mason kag iban pa nga barko nga nagabug-os sang counter-piracy task force sa amo nga Gulf kag sa kadagatan sang Somalia.
Nagpanaog ang lima ka armado nga mga indibidwal kag nagtuyo nga magpalagyo gamit ang ila gamay nga sakayan apang ginlagas sang warship kag sang ulihi, nagsungka sila apang wala ginhingadlan sang US Navy kun sanday sin-o ang attackers.
Gin-report man sang US Central Command nga samtang yara pa ang ila nga warship sa Gulf of Aden, may duha ka missile nga ginpalupad halin sa Yemen nga teritoryo sang rebelde nga Houthis apang nagtupa lamang ini dies nautical miles halin sa kalayuon sang Central Park kag USS Mason.
Nagpaguwa naman sang statement ang Zodiac Maritime nga wala sang napilasan sa 22 nga crew sang chemical tanker.
Ini nga insidente ang katapusan sa serye sa mga pagpang-atake sa mga barko sa dagat sa amo nga rehiyon halin sang nagluntad ang Israel-Hamas war.
Sang nagligad nga semana, may yara man sang cargo ship nga naglabay lamang sa Red Sea apang gin-hijack sang Houthi rebels kag gindala sa port sa Yemen.
May 17 ka Filipino seafarers sa amo nga cargo ship lakip ang isa ka Ilonggo kag wala gihapon nahilway sang mga rebelde tubtub subong. #
