Ipaguwa na sang Korte Suprema subong nga adlaw, Disyembre 5, ang resulta sang 2023 Bar Examinations!
Sa nauna nga notice, gin-anunsyo ni 2023 Bar chair Associate Justice Ramon Paul Hernando nga balantayan sa hapon subong nga Martes ang resulta.
Patigayunon ang traditional release sa lista sang mga nakapasar sa Supreme Court courtyard sa Padre Faura Street, Manila. Tubtub 6:00 sa gab-i nga naka-install ang LED walls kun sa diin iga-flash ang resulta. Buksan naman ang gate sang SC sa publiko halin sa 12:00 sa udto tubtub 6:00 sa gab-i.
Kaangay sa nagliligad nga tuig, ipaguwa man sang Korte Suprema ang resulta sa ila nga website kag sa social media accounts sang SC. Kahapon, may yara na sang ginpaguwa nga QR codes para ma-access man ini sang publiko.
Patigayunon naman ang oath-taking kag roll signing sang makapasar nga examinees sa Disyembre 22 sa SMX Convention Center Manila, Seashell Lane sa Pasay City.
Sini nga tuig, kabug-usan nga 10,387 Bar examinees ang nakakumpleto sang tatlo ka adlaw nga exams nga gin-conduct sa nagkalain-lain nga testing centers sa pungsod.
Ini na ang ikatatlo nga sunod-sunod nga tuig halin sang 2020/2021 Bar exams kun sa diin digitalized ang tests sa baylo sang nakaandan anay nga handwritten exams.
Sang nagligad nga Abril, matandaan nga gin-anunsyo sang Korte Suprema nga kabug-usan nga 3,992 ang nakapasar sa 2022 Bar exams. #
