Ginbasura sang China ang resolution nga ginpasar sang Kamara sa Pilipinas nga nagapakamalaot sang iligal nga mga hulag kag tikang sang Beijing sa West Philippine Sea.
Miyerkules sang ginbotohan ang House Resolution No. 1494 nga amo ang consolidation sang anum ka nagkalain-lain nga resolutions kag naadoptar via viva voce ukon voice voting.
Suno sa amo nga resolusyon, nagapadayon ang China sa pagsulod sa West Philippine Sea apisar sang desisyon sang Permanent Court of Arbitration sang 2016 kun sa diin nakasaad nga wala sang legal kag historical basis ang nine-dash line territorial claim sang China sa amo nga dagat.
Sabat naman ni Chinese Foreign Ministry spokesperson Wang Wenbin, wala sang basehan ang resolusyon sang Pilipinas sa pagpakamalaot kag pag-misrepresent sa China gani ila ini nga gina-reject.
Gin-insister pa sang China nga may yara sila sang “indisputable sovereignty” sa gina-agawan nga teritoryo.
Panawagan pa sini sa Pilipinas, indi pagpadakuon ang maritime disputes sa tunga sang duha ka pungsod kag magbalik sa pagsolbar sang away paagi sa negosasyon kag konsultasyon; kag mag-trabaho na lang kaupod sa China agud mapabilin ang kalinong kag ang stability sa amo nga rehiyon.
Matandaan nga may bungguanay sang PCG vessel kag Chinese Coast Guard ship sang nagligad nga October 22 kadungan sang resupply mission sa BRP Sierra Madre sa Ayungin Shoal.
Ini ang isa sa pinakaulihi nga pagpanghilabot sang China sa Ayungin– teritoryo nga sulod sa exclusive economic zone sang Pilipinas. #
