Nagpaguwa sang statement si President Ferdinand Marcos Jr. nga ang panibag-o nga pagpang-harass sang Chinese Coast Guard kag maritime militia sa West Philippine Sea ang mas nagpalig-on pa sa determinasyon sang Pilipinas nga manindugan sa amo nga away sa teritoryo.
Pahayag pa sang presidente, mas ginpabakod man sini ang determinasyon sang Pilipinas nga protektahan ang kaugalingon nga soberanya, sovereign rights, kag hurisdiksyon sa West Philippine Sea.
Kahapon sang natabo ang isa naman ka insidente kun sa diin naggamit ang China Coast Guard sang water cannons agud bombahan sang tubig ang convoy sang Pilipinas nga may resupply mission sa BRP Sierra Madre sa Ayungin Shoal.
Sa report sang Philippine Coast Guard, nakaangkon sang seryoso nga halit ang makina sang barko sang Pilipinas nga M/L Kalayaan bangud sa ginhimo sang China kag ginguyod na lamang sang Sindangan pabalik sa Ulugan Bay sa Palawan.
Una na nga ginpahayag ni Commodore Jay Tarriela, spokesperson sang Philippine Coast Guard, nga ang naga-conduct sang regular rotation kag resupply mission sa BRP Sierra Madre amo ang supply boats nga M/L Kalayaan kag Unaizah Mae 1 kag gin-updan sang BRP Cabra kag BR BRP Sindangan.
Ginpahayag nga ginbungguan man sang China Coast Guard vessel ang Unaizah Mae 1.
Apisar sang water cannon attack, nakalab-ot gihapon ang UM1 sa BRP Sierra Madre sa Ayungin Shoal kag nakapapanaog sang mga suplay sa military personnel sang Pilipinas nga naka-estasyon sa amo nga area.
Suno kay Marcos, wala sang untat ang iya nga komunikasyon sa mga opisyal sang national defense kag national security.
Nagmandu man ang presidente sa uniformed personnel nga mag-conduct sang mission nga wala ginapabay-an ang safety sang mga personnel, apang indi man dapat pagkalipatan suno sa iya ang “mission-oriented mindset.”
Ginpanindugan man sini nga sulod ang Ayungin Shoal sa Exclusive Economic Zone sang Pilipinas, kag anuman nga pag-claim sang anuman nga pungsod sa amo nga teritoryo ang makabig nga wala sang basehan kag nagalapas sa international law.
“No one but the Philippines has a legitimate right or legal basis to operate anywhere in the West Philippine Sea. The illegal presence in our waters and dangerous actions against our citizens is an outright and blatant violation of international law and the rules-based international order,” pahayag sang presidente.
Sang nagligad nga adlaw, matandaan nga gingamitan man sang China sang water cannon ang vessels sang Bureau of Fisheries and Aquatic Resources nga madul-ong kuntani sang oil kag iban pa nga suplay sa mga manugpangisda sa Bajo de Masinloc. #
