Napasaka na sa Korte Suprema ang ikatatlo nga petition batok sa P125-million nga confidential funds sang Office of the Vice President sang 2022.
Ang nagpanguna sa pag-file sang 33-ka-pahina nga petition amo ang Makabayan bloc lawmakers nga sanday ACT-Teachers Rep. France Castro, Gabriela Women’s Party Rep. Arlene Brosas, kag Kabataan Party-list Rep. Raoul Manuel.
Nalakip man sa petitioners amo ang mga anay mamalidha nga sanday Neri Colmenares, Carlos Zarate, Ferdinand Gaite, Eufemia Cullamat, kag Raymond Palatino, kag anay tiglikom sang Department of Social Welfare and Development nga si Judy Tuguiwalo.
Suno sa petitioners, dapat nga mauntat na ang obsession sa confidential funds, kag ginahingyo sini ang Honorable Supreme Court nga pauntaton na ini nga anomaliya nga amo ang nag-ubos sang pondo sang gobyerno.
Ginsiling man sa petition nga dapat nga ideklarar nga auditable sa Commission on Audit ang P125 million confidential funds sa kaangay nga paagi nga gina-audit ang public funds.
Nakasaad man sa petition nga ang pag-release ni President Ferdinand Marcos Jr. sang P125 million nga confidential funds sa opisina ni Vice President Sara Duterte nga wala sang Congressional authorization ang naglapas sa Section 1, Article VI sang 1987 Constitution.
Matandaan nga sang naglupok ang amo nga isyu sang Septyembre, nadiskubrehan nga 11 ka adlaw lamang nga gingasto sang OVP ang amo nga confidential funds — impormasyon nga ginkumpirma sang Commission on Audit.
Una na nga naghingyo ang Korte Suprema kanday Duterte kag iban pa nga respondents nga sabton ang nauna nga petition nga naga-kwestyon man sang amo nga confidential funds sang 2022.
Matandaan nga ang una nga petition ang gin-file sang mga abogado nga sanday Christian Monsod, Katrina Monsod, Barry Gutierrez kag RP Santiago; samtang ang ikaduha nga petition ang ginpasaka naman sang grupo ni retired senior associate justice Antonio Carpio. ##
