May paglaum pa bala nga mapatuman ang P20/kada kilo nga presyo sang bugas?
Posible ina suno kay Senator Cynthia Villar…. apang sa idalom sang pila ka mga kondisyon.
Pahayag sang senadora nga amo man ang chairperson sang Senate committee on agriculture, food and agrarian reform, kun maimplementar na ang Rice Tariffication Law kag ang Rice Competitiveness Enhancement Fund sang National Rice Program, masarangan nga mapanubo sa P20/kilo ang presyo.
Nagapati si Villar nga yara gid ang problema sa pagpatuman sa sini nga mga layi.
Agud mapanubo ang presyo sang bugas suno sa iya, importante man nga mag-mechanize, kinahanglan man nga hanason kag hatagan sang maayo nga mga binhi ang mga mangunguma, kag kinahanglan nga barato lamang ang kapital.
“Kailangan mura ang puhunan. Kaya may perang binigay sa Landbank at Development Bank of the Philippines. Kaso kung hindi nila ‘yun ibibigay sa farmers ay mahihirapan tayo to be competitive. Pero kung maganda ang implementation of the law we can do it,” pahayag sang senadora.
Sang Septyembre, una na nga nagpahayag si President Ferdinand “Bongbong” Marcos Jr. nga posible pa nga ma-implementar ang P20/kilo nga presyo sang bugas kun magbalik na sa normal ang sektor sang agrikultura sa pungsod kag ang gasto sa produksyon.
Ang P20/kilo nga presyo sang bugas amo ang isa sa pinakabantog nga campaign promise ni Marcos sang nagpadalagan ini sa pagka-presidente. # (Photo: Mong Pintolo / File)
