Naumpawan na ang lawas kag malipayon ang nawong ni Jimmy Pacheco sang nakatapak ini liwat sa Pilipinas!
Si Pacheco amo ang Pinoy caregiver nga nalakip sa ginhilway sang Hamas militants sang nagpatigayon sila sang Israel sang labing-una nga ceasefire sang nagligad nga bulan.
49 ka adlaw man ang gintinir ni Pacheco sa Gaza bilang bihag. Indi basta-basta ang naagyan sini kaangay sang pagkaon sang tissue agud lamang mabuhi.
Sang Oktubre 7 (adlaw sang pagsalakay sang Hamas sa Southern Israel), ginpatay sang militante ang iya 80-anyos nga employer.
Sa pag-abot sini sa Pilipinas, Disyembre 18, lakip sa nag-abi-abi sa iya amo ang iya asawa kag tatlo ka kabataan amo man ang mga opisyal halin sa Department of Migrant Workers (DMW), Overseas Workers Welfare Administration (OWWA), kag Israeli embassy sa Manila.
“Masaya po ako na nandito na ako sa Pilipinas. Nakita ko na ‘yung mga anak ko, pamilya ko, asawa ko. Parang panaginip lang ito sa ‘kin,”pahayag sini.
Nahibaluan nga magluwas kay Pacheco, may isa pa ka Filipino nga ginbihag ang Hamas. Ini amo si Noralin Babadilla nga nalakip man sa ginhilway sang Nobyembre 29.
