Nag-deklarar ang Communist Party of the Philippines (CPP) sang ceasefire sa Armed Forces of the Philippines (AFP) kag sa Philippine National Police (PNP) sa sulod sang duha ka adlaw nga magasugod na subong nga Paskuwa, Disyembre 25.
Ang obserbasyon sang New People’s Army (NPA) sang ceasefire ang kabahin sang pagmarka sang 55th anniversary sang komunista nga grupo nga natuon sa Disyembre 26, Martes nga adlaw.
Nagsugod ini 12:01 kaina sang kaagahon kag magatakop 11:59 buwas sa gab-i.
Suno sa statement sang komunista, ang duha ka adlaw nga ceasefire amo ang magatugot sa ila nga mga NPA units nga magpatigayon sang assemblies, meetings ukon sang gatherings agud iselebrar ang ila nga anibersaryo.
Tuyo man sang grupo nga mabalikan ang ila nga mga kadalag-an kag mahatagan sang tribute ang ila ginakilala nga baganihan kag martir sa Philippine revolution.
“The ceasefire declaration is also in solidarity with the people’s traditional holiday celebration,” suno sa CPP.
Una na nga nagpahayag ang kapulisan nga indi ini mag-rekomendar kay President Bongbong Marcos nga mag-deklarar man sang ceasefire sa komunista nga grupo. Ini bangud sa natabo nga engkwentro sa tunga sang mga soldad kag rebelde sa Balayan, Batangas kun sa diin patay ang isa ka Army trooper kag anum ka mga myembro sang NPA.#
