Gin-report sang Department of Health (DOH) nga may isa ka apat-ka-tuig nga bata nga lalaki sa Calabarzon nga nakatulon sang watusi samtang yara sa ila nga balay.
Ini ang labing-una nga kaso sang watusi ingestion case subong nga holiday season.
Suno pa sa ahensya, ginatinguhaan nga makontak subong ang pamilya sang biktima.
Paathag pa sang DOH, indi man gilayon makit-an ang mga simtomas sang watusi poisoning, apang sa tion nga mag-manifest na sa biktima, naga-sige-sige ini kag posible mangin rason sang kamatayon.
Makamamatay ang watusi bangud may yara ini sang yellow phosphorous, potassium chlorate, potassium nitrate, kag TNT ukon trinitrotoluene nga explosive.
Nagakasal-an ini sang mga kabataan nga kendi bangud bright ang color sini.
Pananglitan may makatulon sang watusi, dapat nga dal-on gilayon sa ospital suno sa DOH, indi pagpiliton nga magsuka ang pasyente kundi dapat hatagan sang egg white bangud amo ini ang magaputos sa yellow phosphorous nga amo ang hilo sa lawas.
Bisan nahatagan na sang egg white ang pasyente, dapat gihapon ini dal-on sa doktor.
Sa ikapito nga adlaw sang monitoring sang ahensya, nakasaad man nga nagsaka na sa 88 ang numero sang fireworks-related injuries sa bug-os nga pungsod. 30 percent diri ang halin sa Metro Manila samtang ang iban nga rehiyon nga may mataas nga kaso amo ang Central Luzon, Ilocos Region, Bicol Region, Davao Region kag Soccsksargen.#
