Ginapamatukan sang China ang ideya ang magatukod ang Pilipinas sang civilian facility sa Ayungin Shoal nga sakop pa man sang exclusive economic zone sang pungsod.
Ini ang kaangot sa pahayag ni Armed Forces of the Philippines (AFP) spokesperson Col. Medel Aguilar nga may plano ang Pilipinas nga may tukuron sa shoal kaangay sang shelter para sa mga manugpangisdsa kag himuon nga permanente nga estruktura.
May ginmensyonar man si Aguilar nga civilian structure kaangay sang lighthouse ukon ang marine scientific research center.
Suno naman kay Chinese foreign affairs ministry spokesperson Mao Ning, wala sang nagapuyo sa Ayungin ukon sa ila ginatawag Ren’ai Jiao.
Suno kay Mao, base sa Declaration on the Conduct of Parties in the South China Sea nga pirmado sang China kag iban nga ASEAN countries, dapat nga wala sang nagapuyo sa amo nga lugar kag dapat nga wala man sang pasilidad.
Ginsulit naman sang China nga kabahin pa sang ila nga teritoryo ang Ayungin.
“The spokesperson of the Armed Forces of the Philippines blatantly claimed that the Philippines will build a permanent structure. This would be another major move the Philippines could take to go back on its words, change its policy, and undermine the uninhabited and facility-free status of Ren’ai Jiao. This will severely infringe on China’s sovereignty, violate international law and the DOC,” pahayag pa ni Mao.
Sang Disyembre 12, mangin si former Supreme Court Senior Associate Justice Antonio Carpio ang nagsiling nga dapat magpatindog na sang estruktura sa Ayungin Shoal kasunod sang mga pagpang-atake sa Filipino vessels sa West Philippine Sea.#
