Ginpasalig sang Department of Transportation (DOTr) nga atubangon sini ang imbestigasyon sang Kongreso sa gina-alegar kurapsyon sa pagplano pa lang sang public utility vehicle modernization program (PUVMP).
Ini kasunod sang pahayag ni House Speaker Martin Romualdez nga magahingyo ini sa House Committee on Transportation nga usisaon ang reports nga may mga transport officials nga nagpakighimbon sa anay mga opisyal agud makig-negosyar para mabuslan sang imported nga modern jeepney units ang mga daan ukon tradisyonal nga mga units.
Suno naman kay Office of Transportation Cooperative Chairman Andy Ortega, bukas ang ahensya nga diskusyunan ang mga problema nga nagapalibot sa modernization program agud nga mapauswag pa ang transportation program sang pungsod.
Paagi man sa mga isyu nga mapasaka sa Kongreso suno kay Ortega, mahambalan ang concerns kag mapangitaan sang solusyon.
“Pupunta muli kami because we always work together with the Congress. Lahat ng issues that are raised to the Congress, we appreciate, we discuss and we come up with solutions,” suno sa opisyal.
Ginpahayag man sini nga may 54 ka jeepney manufacturers nga available kun sa diin mahimo makabakal ang operators sang ila bag-o nga unit, apang wala pa na-check sang DOTr kag sang Department of Trade and Industry (DTI) kun ini nga manufacturers ang kuwalipikado sa idalom sang Philippine National Standard (PNS).
Pila sa gina-set sang PNS nga requirements ang nagasiling nga ang Class 2 kag 3 PUVs (may capacity nga 22 ka pasahero) ang dapat may width nga 235 cm, length nga 700 kag floor-to-ceiling height ngaa 175-centimeter (cm). Dapat nga may yara man sang emergency exit door.
Ang makina sang jeep ang dapat nga Euro-4 kag PNS-compliant ukon LPG-powered, electronic, ukon hybrid.#
