Gin-athag sang Energy Regulatory Commission (ERC) nga indi lamang limitado sa privately-owned nga National Grid Corporation of the Philippines (NGCP) ang imbetigasyon kaangot sa natabo nga power outage sa Western Visayas.
Ini apisar nga ang amo nga korporasyon ang gintumod mismo ni President Ferdinand Marcos, Jr. nga amo ang may salabton sa natabo nga blackout nga apat ka adlaw gid nga gin-antos sang mga residente kag mga negosyante sa bilog nga rehiyon.
Suno kay ERC Chairperson Monalisa Dimalanta, indi man pagpalusuton sa pagpangusisa ang mga power plants agud mahibaluan kun kutub diin man ang ila nga salabton kaangot sa hitabo.
Hibaluon suno kay Dimalanta kun may mga planta nga wala nag-maintain sang standards.
Posible suno sa komisyon nga matapos ang imbestigasyon sa sulod sang anum tubtub walo ka semana.
Ini ang kaangay man sa kalawigon sang imbestigasyon sa power interruptions nga una man nga natabo sa Western Visayas sang 2023.
Pahayag pa sini, magapanguna sa inquiry ang Interim Grid Management Committee nga amo man ang technical group nga nagdumala sang imbestigasyon sang nagligad nga tuig.
Una na nga nagdepensa ang NGCP nga wala sila sang sala sa natabo nga blackout bangud ang ila mandato amo ang pag-provide sang transmission services kag wala na ini nagapahilabot sa power generation — argumento nga ginbali naman sang Energy Regulatory Commission bangud ang transmission service provider ang may yara man sang mandato nga mag-handle sang system operations.
Buot silingon,yara sa ila nga prangkisa kag sa EPIRA ukon sa Electric Power Industry Reform Act nga ang trabaho sang system operator amo nga siguruhon nga safe kag reliable ang operasyon sang grid.
