Matigdas nga nagpaandam ang pila ka mamalidha kaangot sa nagalalapta nga pormas kun sa diin ginapapirma ang mga tawo sa petition agud amyendaran ang constitutional provision nga amo ang magamandu sa Kamara kag Senado nga magboto sang separar kun bag-uhon na ang Konstitusyon.
Isa ini ka kampanya nga ginakabig pabor para sa charter change.
Suno kay Albay Rep. Edcel Lagman, may mga alkalde na sa iya nga probinsya nga ginpatawag sa meeting sang nagligad nga Enero 5 kag ginhatagan sang mga papel kun sa diin papirmahon ang mga residente sa ila nga lugar.
Pahayag pa ni Lagman, sa amo nga meeting, ginhambalan ang mga alkalde nga dapat nga mapirmahan ang petition sang “at least” tres porsyento sang rehistrado nga mga botante sa distrito kun sa diin nalakip ang ila munisipalidad.
Ang kada botante nga magapirma sa petition ang hatagan sang P100 kada isa — kag singkwenta porsyento diri ang na-abanse na nahatag sa municipal mayors kag sa mga coordinators.
Paandam pa ni Lagman, nagaguwa nga nagakatabo sa bug-os nga pungsod ini nga movement bangud napadal-an na sang pormas ang mga kongresista nagikan sa nagkalain-lain nga mga partido.
Wala ginhingadlan ni Lagman kun sin-o ang mga tawo sa likod sang gina-alegar nga kampanya para sa charter change.
Sa pihak nga bahin, ang Ilonggo naman nga kongresista nga si Kabataan Party-list Rep. Raoul Manuel ang nagpost man sang picture nga pareho sa ginasiling ni Lagman.
Ginkwestyon ni Manuel kun diin naghalin ang dokumento kag kun may yara gid bala sang kagustuhan ang publiko para sa charter change.
Nagpahayag man si House Deputy Minority Leader France Castro sang ACT Teachers Party-list nga ginapamatukan sini ang paggamit sang “people’s initiative” agud iduso ang charter change bangud mas madamo pa nga isyu ang dapat nga tutukan sang pungsod.
Sang Disyembre,matandaan nga nagpahayag si Speaker Ferdinand Martin Romualdez nga iduso sang Kamara nga amyendaran ang porsyon sang 1987 Constitution subong nga 2024.
Pila na ka mga proposal ang naaprubahan sa Kamara apang wala man nagakadayon ang amo nga lihok bangud sa kakulang sang suporta sa Senado.
