Naghingyo ang isa ka mamalidha kay President Ferdinand Marcos Jr. nga i-review ang competence sang mga opisyal sa Commission on Higher Education (CHED) kasunod sang ila pagpaguwa sang direktiba nga untaton ang senior high school program sa state universities and colleges (SUCs).
Suno kay Surigao del Norte Rep. Ace Barbers, sa baylo nga mangin kabahin sang solusyon, naghimo pa gid ang CHED sang bag-o nga problema nga daw kaangay nga wala pa sang sampaw-sampaw nga problema ang sistema sang edukasyon sa pungsod.
Ang bag-o nga pronouncement suno sa kongresista ang nagapakita lamang sang prayoridad kag “incompetence” sang nagapungko nga commissioners gani dapat nga lantawon liwat ang ila nga mga kuwalipikasyon kag outputs.
“Some Commissioners act like Gods and lord it over the institutions of higher learning. These are questions of character which do not have a place in our educational system,” kabahin sang statement ni Barbers.
Enero 3 sang nagsiling ang komisyon nga indi na pagbatunon sang state universities and colleges ang senior high school students bangud ang voucher program sang gobyerno ang naga-cover lamang sa K-12 transition period halin sa school years nga 2016-2017 kag 2020-2021.
Una na nga ginpahayag ni CHED Chairman Prospero de Vera III nga handa sila nga magbulig sa transisyon apang dapat ini nga pangunahan sang Department of Education (DepEd) kag Board of Regents bangud ini nga mandato ang napaidalom sa basic kag secondary education nga indi na iya sang CHED.
Kahapon, Enero 7, nag-file man si House Deputy Minority Leader kag ACT Teachers party-list Rep. France Castro kag ang iban nga mamalidha sa Makabayan bloc sang House Resolution 1533 kun sa diin ginaduso nga imbestigaran ang assistance program sang CHED kag DepEd lakip na ang Senior High School Voucher Program (SHS-VP).
Gindugang man nga importante man ang imbestigasyon sa Government Assistance to Students and Teachers in Private Education (GASTPE) agud matumod kun napatuman kag na-align sang mga ahensya sang edukasyon ang ila mandato sa paghatag sang de-kalidad nga edukasyon para sa tanan. #
