Handa nga magpakigkita kag mag-istorya si President Ferdinand Marcos Jr. kay anay Presidente Rodrigo Duterte kaangot sa isyu sa suspensyon sa Sonshine Media Network International (SMNI).
Antes sini, ginkatingala ni Duterte kun nga naapektuhan ang iya programa nga “Gikan Sa Masa, Para Sa Masa” samtang padayon nga gina-imbestigaran sang otoridad ang network.
Pahayag pa sang anay presidente, wala man siya sang nadumduman nga ginpakamalaot niya si Marcos kag wala man siya nagkomento sa direksyon sang pagpadalagan sang gobyerno.
Suno naman kay Communications Secretary Cheloy Velicaria-Garafil, handa si Marcos nga makig-istorya sa anay chief executive kag maga-kontak pa ini mismo kay Duterte kun luyag sini nga matabo ang meeting.
Disyembre 21 sang ginsuspinde sang National Telecommunications Commission (NTC) ang operasyon sang amo nga network sa sulod sang 30 ka adlaw kasunod sang resolusyon sang Kamara nga nagapanawagan sang suspensyon bangud sa gina-alegar paglapas sang SMNI sa terms and conditions sang ila nga prangkisa.
Sang Disyembre 19, may yara man sang 14 ka adlaw nga preventive suspension nga ginpaguwa ang Movie and Television Review and Classification Board (MTRCB) sa duha ka programa sang SMNI lakip ang “Laban Kasama Ang Bayan” kag ang programa ni Duterte nga “Gikan Sa Masa, Para Sa Masa”.
Madumduman nga sa amo nga programa gin-ere ni Duterte ang mga pagpamahog batok kay anay ACT Teachers party-list Rep. France Castro nga iya man gintawag nga naangot sa komunista nga grupo.#
