Magaabot si Indonesian President Joko Widodo sa Pilipinas subong nga Martes, Enero 9, para sa tatlo ka adlaw nga official visit.
Natalana ini nga magpakigkita kay President Ferdinand ‘Bongbong’ Marcos Jr. buwas sa Malacañang.
Sa ila nga meeting, lauman nga istoryahan sang duha ka lideres ang relasyon sang Pilipinas kag Indonesia kasunod man sang state visit ni Marcos sa Jakarta sang Septyembre 2022.
Sa Nobyembre 2024 naman ang ika-75 nga anibersaryo sang pormal nga diplomatic relations sa tunga sang duha ka nasyon.
Pareho ang Pilipinas kag Indonesia nga founding members sang Association of Southeast Asian Nations (ASEAN).
Ginlaragway man sang DFA ang duha ka pungsod nga suod nga magkaiping nga nasyon kag partners kag may maayo nga kooperasyon sa madamo nga aspeto — kaangay sang political, economic, kag people-to-people relations.
Magluwas kay Marcos kag Widodo, magakit-anay man sanday Foreign Affairs Secretary Enrique Manalo kag iya Indonesian counterpart nga si Retno Marsudi agud istoryahan ang nagapanguna nga regional kag international issues.
Pagkatapos sang pagbisita ni Widodo, magaabot man sa Pilipinas si German Foreign Minister Annalena Baerbock para sa official visit sa Enero 11-12.
Subong nga 2024 amo naman ang 70th anniversary sang diplomatic relations sang Pilipinas kag Germany.#
