Nagpanawagan si Pope Francis nga dumilian sa bilog nga kalibutan ang surrogacy — isa ka practice nga iya ginlaragway nga “deplorable”.
Sa surrogacy, isa ka babayi ang nagabusong sang bata para sa couple nga indi maka-conceive ukon makadala sang bata bangud sa pila ka partikular nga rason: halimbawa, pisikal ukon medical.
Sa iya nga New Year’s address sa diplomats sa Vatican, ginpahayag sang Santo Papa nga ang nasambit nga proseso ang makabig nga “grave violation” sa dignidad sang iloy kag sang bata.
“In this regard, I deem deplorable the practice of so-called surrogate motherhood, which represents a grave violation of the dignity of the woman and the child, based on the exploitation of situations of the mother’s material needs.”
Pahayag pa sang 87-anyos nga Santo Papa, isa ka regalo ang bata kag indi basehan sang commercial contract.
“Consequently, I express my hope for an effort by the international community to prohibit this practice universally.”
Sang Hunyo 2022, matandaan nga ginkondenar man sang Santo Papa ang surrogacy kag gintawag nga indi makatawo nga sahi sang practice.
Una naman nga nagpamatok si Pope Francis sa iya gintawag nga “uterus for rent” kag may pila man ka mga pungsod sa Europa nga nagadumili diri — kaangay sang Espanya kag Italya.
Nahibaluan nga legal ang “altruistic” surrogacy sa pila ka pungsod kaangay sang Belgium, the Netherlands, the UK, Canada, Brazil kag Colombia samtang legal naman ang commercial surrogacy sa pila ka states sa USA. #
