Magapanumpa na subong nga adlaw si House Deputy Speaker kag Batangas Representative Ralph Recto bilang bag-o nga tiglikom sang Department of Finance (DOF).
Suno sa Malacañang, kaupod man sa oath taking ceremony nga pangunahan ni President Ferdinand Marcos Jr. amo ang newly appointed Presidential Aide nga si Frederick Go.
Ang una nga nagkumpirma sa bag-o nga posisyon ni Recto amo ang asawa sini nga si former Batangas Governor Vilma Santos.
Buslan sang amo nga kongresista sa posisyon si outgoing Finance Secretary Benjamin Diokno.
Antes nangin congressman sa 6th district sa Batangas, nagpungko si Recto sang tatlo ka termino bilang senador.
Nakaserbe man ini bilang Secretary General sang National Economic and Development Authority (NEDA) halin sang 2008 tubtub sang 2009 sa idalom ni former President Gloria Macapagal-Arroyo.
Sa iya naman pagtinir sa Senado, lakip sa ginduso sini amo ang Tax Reform for Acceleration and Inclusion ukon TRAIN Act, ang Rice Tariffication Act, ang Ease of Doing Business kag Efficient Government Service Delivery Act.
Bilang congressman naman, lakip man siya sa principal author sang pila ka mga hagna lakip na ang pagbulig sa medium, small and micro-enterprises.
May gina-uyatan si Recto nga Bachelor’s Degree in Commerce halin sa De La Salle University; Master’s Degree in Public Administration halin sa University of the Philippines kag MA in Business Economics halin sa University of Asia and the Pacific.
Bilang pinuno sang DOF, updan sini ang Gabinete kag ang economic team sa pagganyat sang dugang nga investments kag pagdeliher sa fiscal policy sang pungsod.#
