Nagapakig-angot na ang Department of Foreign Affairs (DFA) sa Iranian autorities agud mahibaluan ang sitwasyon sang 18 ka Pinoy seafarers nga nalakip sa crew sang oil tanker nga pakadto kuntani sa Turkey apang ginbanggaan sang Iran sa Gulf of Oman.
Ang pagsakop sang Iran sa amo nga tanker nga St.Nikolas ang ginakabig nga pagtimalos sini sa Estados Unidos sang Amerika nga amo ang una nga nagkumpiska sa amo man nga vessel kag sa langis nga karga sini sang nagpatigayon sila sang sanction enforcement operation sang nagligad nga tuig.
Suno kay Foreign Affairs Usec. Eduardo de Vega, ginpalab-ot na nila sa Iran ang kahangawa sang Pilipinas sa safety sang mga Pinoy seafarers apang sa subong, ginahulat pa ang opisyal nga report sang embahada sang pungsod sa Iran amo man ang Iranian Embassy in Manila.
“The Philippine Government will spare no efforts in effecting the release of our nationals,” kabahin pa sang pahayag sang DFA.
Ginkondena naman sang Amerika ang amo nga hitabo.
Suno kay Vice Adm. Brad Cooper, commander sang US Naval Forces Central Command kag Commander sang US 5th Fleet, ang nangin aktwasyon sang Iran ang nagabali sa international law kag nagapahog sa maritime security kag stability.
Nagpahayag naman si US State Department spokesman Vedant Patel nga dapat na nga paguwaon sang Iranian government ang tanan nga crew kag hilwayon man ang barko.
“This unlawful seizure of a commercial vessel is just the latest behavior by Iran or enabled by Iran aimed at disrupting international commerce,” kabahin sang statement ni Patel.
Una na nga gin-report sang Ambrey, isa ka British maritime risk company, nga gintabunan sang mga lalaki ang surveillance camera, gin-utod ang tracking system raso nga nadulaan sang komunikasyon ang otoridad sa amo nga vessel nga may karga nga 145,000 tonelada nga krudo halin sa Basra, Iraq.#
