Nag-file sang resolution ang Makabayan bloc agud maimbestigaran sa Kamara ang gina-alegar paggamit sang pondo sang gobyerno para mabakal ang mga pirma sang mga tawo para sa ginaduso nga charter change ukon Cha-cha.
Suno kay House Deputy Minority leader kag ACT Teachers party-list Rep. France Castro, nakabaton sila sang reports kaangot sa lapnagon na nga vote-buying para sa people’s initiative ukon ang Constitutional provision nga amo ang magapahanugot sa Kamara kag sa Senado nga magboto sang tingob —sa baylo nga separado — sa pag-amyendar sa Konstitusyon.
Sa reports nga nabaton sang mamalidha, sa kada pirma sang tawo, ginpromisahan ini sang ayuda; may yara man nga gindungan ang pagpapirma sa gift-giving actvity sang nagligad nga Paskuwa; kag may report man nga natuntuhan man pati ang Persons with Disability (PWD) agud mapirmahan ang ginaduso nga Cha-cha.
Ini ang nagtulod kanday Castro, Gabriela Rep. Arlene Brosas, kag Ilonggo Congressman kag Kabataan Rep. Raoul Manuel nga i-file ang House Resolution 1541.
Una na nga ginpahayag ni Makabayan coalition chairperson kag anay Bayan Muna representative Neri Colmenares nga bisan nagapati siya nga indi man magmadinalag-on ang signature campaign, dapat nga madasig gihapon ang hulag sang mga tawo nga nagapamatok sa Cha-cha.
Sang nagligad nga semana, nagpahayag man ang presidential sister nga si Sen. Imee Marcos nga may gintanyag nga P20 million kada distrito sa pila ka mga probinsya agud nga pangbaklon ang mga pirma sang tawo para sa people’s initiative.
Nag-file man si Marcos sang resolution agud ma-review sang Senado ang Republic Act 6735 —ang layi kun sa diin nakasaad ang system of initiative kag referendum.
May reports man nga gin-cite kun sa diin nagdangat na sa P1,000 ang ginabaylo sa kada pirma sang tawo.
Gin-alegar man nga naglapta na ini nga kampanya sa pila ka mga rehiyon partiular sa Metro Manila, Ilocos, Central Visayas, Eastern Visayas, kag Zamboanga Peninsula.#
