Nagpasalig si Senator Juan Miguel Zubiri nga magapanaog sa posisyon bilang senate president kun makalusot sa Senado ang mga ginaduso nga pagbag-o sa political provisions sa 1987 Constitution.
Sa statement nga ginpaguwa ni Zubiri kagab-i, ginsiling sini nga ang igaduso lamang sang Senado amo ang pag-amyendar sa economic provisions sang Konstitusyon agud nga makaganyat sang dugang nga investors sa pungsod.
“Rest assure you, wala po tayong political amendments… It will be my political head at stake. At least sa amin sa Senado hindi namin ipapasingit ‘yan. If there will be a move like that, then I will resign as Senate President. It’s as simple as that. We guarantee, it’s only simple economic amendments, economic provisions, and para gumanda ang bansa at hindi para sa kapakanan ng iilang tao, lalu na sa mga pulitiko,” pahayag sini.
Ginsulit man sini ang direktiba sang presidente kadungan sang ila katapusan nga meeting nga magapanguna sa review sang charter ang Senado kag ang bersyon man sang Senado ang adoptaron.
Madamo ang nakabati sa amo nga mandu sang presidente suno kay Zubiri kag nagpasugot man mismo si House Speaker Martin Romualdez.
Matandaan nga sang Lunes, nag-file si Zubiri kag sanday Senate President Pro Tempore Loren Legarda kag Senator Sonny Angara sang Resolution of Both Houses No. 6 nga amo ang nagaduso sang amendments sa pila ka probisyon sa Konstitusyon partikular ang operasyon sang public utilities, education services, kag players sa advertising industry.#
