Indi magduha-duha si Senator Jinggoy Estrada nga ipasaka sa Korte Suprema ang kaso sini pananglitan iga-deny sang Sandiganbayan ang iya iga-file nga motion for reconsideration.
Suno sa senador, importante sa iya nga ma-apelar gid ang iya conviction sa bribery kag namanduan naman sini ang iya mga abogado nga himuon ang tanan nga legal remedies para sa iya.
Pananglitan sipaon man ini sa Senado, ginpahayag ni Estrada nga ginatugyan na lang niya ang iya kapalaran sa iya mga kaupod nga Senador.
Una na nga ginpahayag ni Senate President Zubiri kag sang kampo ni Estrada nga magapabilin si Jinggoy nga senador bangud indi pa man pinal kag executory ang desisyon nga ginpaguwa sang Sandiganbayan kahapon, Enero 19.
Kun balikan, sa unanimous voting, gin-sentensyahan sang Sandiganbayan – Fifth Division nga not guilty si Estrada sa plunder kaangot sa iya involvement sa pork barrel scam.
Acquitted man mangin ang businesswoman nga si Janet Napoles nga amo ang sentro sang scheme nga ginakaulamiran sang high-ranking legislators.
Apang indi ini happy ending para kay Estrada bangud nag-desisyon ang korte nga i-convict ini sa one count sang direct bribery.
Ginmanduan ini nga magbayad sang penalidad nga P3 million kag pagkapreso nga tubtub sa siyam ka tuig kag apat ka bulan bilang maximum punishment.
Magluwas diri, guilty man ang senador “beyond reasonable doubt” sa duha ka counts sang indirect bribery kun sa diin may penalidad nga pagka-preso sang tubtub sa tatlo ka tuig, anum ka bulan, kag 20 ka adlaw nga jail time sa kada count.
Magluwas sa jail time kag sa kuwarta nga multa, yari pa ang sanctions:
*Sa direct bribery: “Special temporary disqualification, and the accessory penalties of temporary absolute disqualification and that of perpetual special disqualification from the right of suffrage.”
* Sa indirect bribery: “Penalties of suspension and public censure, with the accessory penalties of suspension from public office, from the right to follow a profession or calling, and that of perpetual special disqualification from the right of suffrage.”
Mangin ang Sandiganbayan ang nagsiling man nga mahimo gihapon nga maka-avail sang legal remedies si Estrada kasunod sang conviction.
Ang pwede sini mahimo amo nga mag-file sang motion for reconsideration agud hingyuon sa anti-graft court nga i-konsiderar liwat ang amo nga desisyon ukon mag-file sang appeal sa Supreme Court amo ang katapusan nga korte nga iya madalaganan.#
