ILOILO CITY- Nagsabat ang Land Transportation Franchising and Regulatory Board nga indi simple ang consolidation process kasunod sang pagkwestiyon sang mga drivers kag operators kun ngaa wala sila na-consolidate apisar nga nakatigayon man sila sang ila application for consolidation.
Sa interview sang Bombo Radyo kay Atty. Salvador ‘Jun’ Altura, spokesperson sang Land Transportation Franchising and Regulatory Board Region 6, iya ginpahayag nga posible nga wala na- qualify ang drivers/operators nga makapa-consolidate bangud madamo sang ammendments sa rules sang consolidation.
Suno kay Altura, sadto, may minimum nga 15 nga drivers/operators ang makapa consolidate sa kada ruta kag kun may ruta nga wala nakalab-ot sa 15, automatic sila nga i-disqualify sa ila application, apang ang ini nga requirement ang gindula na antes nagtakop ang Disyembre 31, 2023 nga deadline sang application for consolidation.
Pahayag ni Altura, sa sitwasyon sang Iloilo City, ang consolidation process ang naapektuhan sang Local Public Transport Route Plan bangud sang napatuman ini kag na- award ang ruta sa nagkalain-lain nga kooperatiba, wala na sang rason nga mag- consolidate sang dugang nga units bangud wala na sang entry points.
Wala man ginpanginwala ni Altura nga madamo sila sang nabaton nga reklamo gikan sa operators/drivers nga nag- apply sa consolidation, nagbayad sang consolidation fees apang wala na- consolidate.
Paathag naman niya, indi makahulag ang ila opisina sa sini nga issue bangud napaidalom ini sa hurisdiksyon sang Office of the Transport Cooperative kag Cooperative Development Authority.
