ILOILO CITY- Magapangatubang sang sampaw-sampaw nga kaso ang isa ka taxi driver nga una na nga gin-aresto matapos nakabunggo sa naga-park nga salakyan sa Barangay 4 Poblacion, Tigbauan, Iloilo.
Ang taxi driver amo si Michael Ang Khi, 42, residente sang Barangay Namucon sang amo nga banwa.
Sa interview sang Bombo Radyo kay Police Captain George Linantod, hepe sang Tigbauan Municipal Police Station, iya ginpahayag nga sang ginsekyar ang salakyan sang driver nakuhaan ini sang isa ka Pietro Beretta 9mm pistol kag nakuha man sa paghinakup sini ang isa ka sachet sang supected shabu.
Suno kay Linantod, kaso nga reckless imprudence resulting to damage to property ang igapasaka sa tag-iya sang salakyan nga iya nabunggu-an.
Dugang pa ni Linantod, magluwas sa amo nga kaso pagatubangon man sini ang kaso nga paglapas sa Republic Act No. 10591 ukon Comprehensive Firearms and Ammunition Regulation Act kag Republic Act No. 9165 ukon Comprehensive Dangerous Drugs Act of 2002.
Sa subong, detained ang taxi driver sa Tigbauan Municipal Police Station.
Nahibaluan man nga si Angkhi ang may malain nga record naman sa ila lugar bangud maoy ini kag nagapalupok sang armas kun mahubog.
Samtang, gin-athag naman sang Association of Taxi Operators in Panay nga indi myembro sang ila asosasyon ang operator nga amo man ang naga-drive sang taxi unit nga nakabunggo sa naga-park nga salakyan sa Barangay 4 Poblacion, Tigbauan, Iloilo.
Sa interview sang Bombo Radyo kay Mr. Perfecto Yap, presidente sang asosasyon, iya ginpahayag nga sa iya pagkahibalo, lain-lain ang operators sang Tin-tin taxi bangud gintululunga ini sa mga myembro sang isa ka pamilya.
Suno kay Yap, bangud nga individual operator si Angkhi, wala ini sang may ginasunod nga regulasyon.
Pahayag ni Yap, sa ila bahin sa Association of Taxi Operators in Panay, may yara gid sila sang ginapatuman nga pagsulundan ilabi na kun maayo nga batasan kag moralidad sang driver ang istoryahan.
