Nagdangat sa 22 ka retirado nga heneral ang nakaistorya ni House Speaker Martin Romualdez kag lunsay nanginwala sa nagalutaw nga alegasyon nga may mga alumni ang Philippine Military Academy (PMA) kag iban pa nga military retirees nga nagasuporta sa mga lihok agud gamuhon ang administrasyon ni President Ferdinand “Bongbong” Marcos Jr.
Ini nga retired generals ang naghalin sa apat ka major groups nga amo ang PMA Alumni Association, Association of Generals and Flag Officers, Philippine Military Academy Retired Alumni Association, kag National ROTC Alumni Association, Inc.
Suno kay Romualdez, indi pagpanggamo kundi suporta kay Marcos ang ginpaalinton sang amo nga mga retirado nga heneral.
Pahayag ni Admiral Danilo Abinoja, chairman and chief executive officer sang PMA Alumni Association, Inc., nagapabilin ang ila panumpa nga pangapinan ang Konstutusyon kag ang otoridad.
Sa pahayag nga ginpagwa sang opisina ni Romualdez, ginsiling man ni Abinoja na suportado man si Marcos sang iban pa nga mga eskwelahan nga para sa mga servicemen kaangay sang Navy, Air Force kag Coast Guard.
Antes sini, nagpanginwala man ang pamunuan sang Armed Forces of the Philippines (AFP) kag Philippine National Police (PNP) nga may yara sang destabilization plot batok sa gobyerno. #
