ILOILO CITY- Ginplastar sang Commission on Elections nga P13 billion ang kinahanglan nga budget sang pungsod para sa charter change referendum.
Suno sa komisyon, mahimo ini mag-eksperyensiya sang “financial crisis” kun madayon ang national referendum subong nga tuig.
Pahayag sang poll body, mas maayo nga himuon ang referendum para sa charter change sa 2026 ukon sa tion nga natapos na ang 2025 elections.
Suno kay Teofisto Elnas Jr., Comelec Executive Director, kuntani wala sang matabo nga plebisito partikular sa Oktubre bangud umpisa na ini sang filing sang certificate of candicacy (COC) tubtob Nobyembre kag Disyembre kag mangin masako naman sila sa Enero tubtob Abril bangud ini ang period sang preparasyon.
Pahayag niya, mas dako nga pagpanghangkat kun i- set ang referendum sa 2025, ilabi na nga may national kag local elections kag may yara man sang Barangay and Sangguniang Kabataan Elections.
Una na ginpahayag sang komisyon nga indi magnubo sa 884 ka syudad kag banwa ang nakabaton sang pila ka pahina sang pirma para sa people’s initiative agud amyendaran ang 1987 Constitution.
Sa tion nga malab-ot ang numero sang required nga pirma,ang proponents sang amo nga people’s initiative ang kinahanglan nga mag-file sang petition sa Comelec kag ini ang i- verify nila.
Kun ma-verify ang mga pirma, maga- schedule ini sang national plebiscite ukon referendum kun sa diin magaboto ang mga tawo para sa proposed constitutional amendments sang petitioners.
