ILOILO CITY- Liwat nga nanindugan si President Ferdinand “Bongbong” Marcos Jr. nga ginakabig niya nga pagpamahog sa soberanya sang Pilipinas ang International Criminal Court.
Suno kay Marcos, wala niya ginakilala ang hurisdiksyon sang International Criminal Court sa pungsod kag bisan isa ka tudlo, wala sang pahulagon ang gobyerno agud magbulig sa imbestigasyo nga ginapatigayon sang international tribunal.
Gin- athag naman ni Marcos nga mahimo sa gihapon magpadulong sa Pilipinas ang mga probers bilang ordinaryo nga mga tawo, apang hugot nga i-monitor sang gobyerno- ang ila nga mga hulag ilabi na kun intensyon nila ang magpakigsugilanon sa mga ahensya.
Ini nga pahayag sang Presidente ang kasunod sang panawagan ni Sen. Ronald “Bato” dela Rosa sa Malacañang nga isugid kun gintugutan na sini ang mga imbestigador nga magsulod sa Pilipinas.
Sang damlag lang, ginpahayag man ni anay Senator Antonio Trillanes IV nga may impormasyon nga nag-abot na sa pungsod ang mga probers sang nagligad pa nga Disyembre kag may iga-isyu na nga warrant batok kay anay Presidente Rodrigo Duterte kag iban nga respondents may kaangtanan sa probe sang tribunal sa “war on drugs.”
Ginpahayag man sang anay senador nga nakapatigayon na ang probers sang interviews sa mga concerned individuals.
Matandaan nga ginsiling sang Presidente nga indi ini magkooperar sa amo nga imbestigasyon nahanungod sa gin-alegar nga pagpang-abuso nga nakumiter sa idalom sang drug war sang Duterte administration.
