ILOILO CITY- Padal-an sang subpoena sang Senate Committee on Women, Children, Family Relations and Gender Equality si Pastor Apollo Quiboloy bangud sa indi niya pagtambong sa imbestigasyon sang komitiba kaangot sa mga alegasyon batok sa ginapamunuan niya nga religious group nga Kingdom of Jesus Christ (KOJC).
Suno kay Senadora Risa Hontiveros, chairman sang komitiba, duha ka beses sila nagpadala sang imbitasyon apang wala sang sabat kag attendance ni Pastor Quiboloy rason nga nag-isyu sila sang subpoena kay Quiboloy para sa masunod nga hearing.
Suno kay Hontiveros, nagpadala sang sulat si Quiboloy kay Senate President Juan Miguel Zubiri apang wala ginmitlang sang senadora ang detalye sang sulat.
Nahibaluan nga ginaakusahan ang Kingdom of Jesus Christ nga involved sa large-scale human trafficking, rape, sexual abuse and violence, kag child abuse.
Ginmando man ni Hontiveros nga padal- an sang imbitasyon sang tatlo pa ka mga tawo nga ginpangalanan sa testimonya sang mga biktima sa ginpatigayon nga hearing.
Disyembre sang 2023 sang nag-file sang resolusyon si Hontiveros agud paimbestigaran “in aid of legislation” ang Kingdom of Jesus Christ.
Una na nga ginhangkat sang abogado ni Quiboloy si Hontiveros nga dal-on sa korte ang mga alegasyon, kag gintawag sini nga “deception” lang ang imbestigasyon sa Senado.
