Aprubado na ni President Ferdinand Marcos Jr. ang rekomendasyon ni Transportation Secretary Jaime Bautista nga hatagan sang tatlo pa ka bulan ang unconsolidated jeepneys agud nga makasulod sa transportation cooperatives ukon corporations nga kabahin sang Public Utility Vehicle Modernization Program (PUVMP).
Suno sa Presidential Communications Office (PCO), tubtub sa Abril 30, 2024 ang ginhatag nga extension sang presidente.
Antes sang kumpirmasyon halin sa Malacañang, gin-aprubahan sang House Committee on Transportation ang resolution nga nagapanawagan kay Marcos nga ikonsiderar liwat ukon palawigon man ang grace period nga ginhatag para sa unconsolidated jeepneys.
Sandig sa pinakaulihi nga datos halin sa Land Transportation Franchising and Regulatory Board (LTFRB), yara sa 1,767 ka mga ruta sa bug-os nga pungsod ang wala sang consolidated public utility jeepney drivers kag operators.
Kasunod sini, ginpahayag sang trasport regulatory board nga magasunod ini sa direktiba sang presidente. May board meeting man nga ipatawag subong nga adlaw agud diskusyunan ang recalibration sang PUV modernization program.
Bukas man ang talatapan nga magpatigayon sang dayalogo kaupod sa mga transport groups agud nga mahatagan sang ligwa ang ila nga mga problema kag kahangawa sa modernization program.#
Photo: Maria Tan
