Gin-athag ni Vice President Sara Duterte nga wala ini sang plano nga mag-resign bilang bise presidente sang pungsod kag tiglikom sang Department of Education (DepEd).
Kasunod ini sang event sa Davao City kun sa diin sa iya nga speech, gindeklarar ni Duterte ang iya plano nga magpadalagan liwat sa masunod nga eleksyon apang wala sini gin-mensyonar kun ano nga posisyon.
Ginsaad man sini nga magapadalagan man ang iya mga utod nga sanday Davao City Mayor Sebastian Duterte kag Davao City 1st District Representative Paolo Duterte.
Suno kay Duterte, wala lang nahangpan sang tawo ang kaundan sang speech kag na-misinterpret gani may naghangop nga maga-resign siya bilang bise presidente.
“Ang sinabi ko sa pagtakbo is that nandoon lahat nakalatag sa speech ko sa Barangay Bago Gallera sa Davao City. I think ‘yung confusion is piecemeal ang appreciation ng mga tao doon sa sinabi ko. Ibig sabihin, tinatanggal nila ang isang linya para sabihin kung ano ang gusto nila na interpretation,” pahayag sini.
Gin-athag man sini nga wala pa niya naistorya kay President Ferdinand “Bongbong” Marcos Jr. ang iya plano sa eleksyon. #
