ILOILO CITY- Liwat nga nag-abiso ang Philippine Coast Guard nga apektado ang byahe sang mga sea vessels nga may ruta nga Parola- Guimaras and vice versa sa patigayunon nga fluvial procession sa Iloilo River kag Iloilo Strait sa Biernes, Enero 26, bilang isa sa mga religious activities sa Dinagyang Festival 2024.
Sa interview sang Bombo Radyo kay Commander Paterno Belarmino,spokesperson sang Philippine Coast Guard Western Visayas, iya ginpahayag nga natalana nga magsugod ang procession sa las-12 sang udto kag posible maglawig ini sang tatlo tubtob apat ka oras nga magaresulta sang temporaryo nga pagpauntat sang byahe sang mga sakayan.
Suno kay Belarmino, 30-50 ka mga bangka ang magaintra sa fluvial procession kay may mga modernized boats man nga magaupod.
Ginpasiguro naman sang natungdan ang paghatag seguridad sa tanan nga mga deboto kun sa diin may i-deploy nga 50 ka mga katapo sang Philippine Coast Guard Station- Iloilo,100 ka mga Philippine Coast Guard personnel halin sa regional office, kag 300-350 Coast Guard auxiliaries agud mag- assist sa mga deboto.
Kahapon,nagpatigayon sang dry run ang Philippine Coast Guard kaupod ang iban nga ahensya sang gobyerno kaangay sang maritime police,local police, mga operators sang modernized boats kag mga floating assets agud mas mahibaluan nila ang mangin dalagan sang prsusisyon kag mapreprahan kun paano dumalahon ang mga posible nga scenario sa tion sang prusisyon.
