Nagpanawagan si Armed Forces of the Philippines (AFP) chief of staff General Romeo Brawner Jr. sa militar nga suportahan ang “Bagong Pilipinas” nga bag-o gid lamang ginlunsar sang Marcos Administration.
Ini nga official statement ang ginpaguwa kasunod sang Bagong Pilipinas rally nga ginapangunahan ni President Ferdinand Marcos Jr. sa Manila sang Domingo nga adlaw.
Sa Davao City naman, sang amo man nga adlaw, yara si anay Presidente Rodrigo Duterte kag ang iya mga anak nga nagapanawagan sa AFP kag sa Philippine National Police (PNP) nga protektahan ang Konstitusyon sa tunga sang mga lihok para sa charter change. Didto man sa Davao nagpaguwa sang pasabog si Duterte kag gintawag si Marcos nga “bangag”, “drug addict”, kag makapila ka beses nga ginbuyayaw.
Suno naman kay Brawner, magapabilin nga competent ang militar kag non-partisan sa trabaho sini nga protektahan ang mga Filipinos batok sa pagpamahog sa sulod man ukon halin sa luwas sang pungsod.
”The AFP shall continue to be united, competent, capable, and non-partisan – steadfast and committed to our mandate of protecting our People and securing our State from all threats, foreign and domestic,” kabahin sang statement.
Ginsiling man sini sa bug-os nga armadong kusog sa pungsod lakip sa mga soldado, airmen, sailors kag marines nga seryosohon kag hangpon ang mensahe sang Commander-in-Chief kag dapat nga mangin ehemplo kun ano ang buot silingon sang Bagong Pilipino sa Bagong Pilipinas.
Mahimo ini suno sa iya paagi sa pag-focus sa mission kag ipabilin ang tradisyon sang kaisog, loyalty, kag sakripisyo.
”I enjoin our soldiers, airmen, sailors, and marines to take to heart the message of our Commander-in-Chief and become exemplars of what it means to be a Bagong Pilipino in a Bagong Pilipinas by remaining focused on our mission, true to the tradition of bravery, duty, loyalty, and sacrifice in our noble profession of arms,” dugang sa statement.
Dugang pa diri, dapat nga isa ka highly professional military organization ang AFP, loyal sa Constitution, sa chain of command, kag sa mga pumuluyo.
Una na nga ginsiling ni Duterte sa iya nga speech nga ang militar gid lamang kag ang pulis ang makasagang sang mga pagpamahog batok sa estado, halimbawa, ang people’s initiative nga ginaduso agud ma-amyendaran ang 1987 Constitution.#
