ILOILO CITY- Nagpabor si Iloilo First District Representative Doc. Janette Garin sa ginaduso sang People’s Initiative for Modernization and Reform Action (PIRMA) nga amyendaran ang 1987 constitution.
Sa interview sang Bombo Radyo kay Garin, iya ginpahayag nga kinahanglan nga bag-uhon ang constitution ilabi na sa economic provision bangud tama na ka ulihi ang Pilipinas sa aspeto sang pagkaprogresibo kun ekonomiya ang pagahambalan.
Suno kay Garin, kun matigayon nga maamyendaran ang 1987 constitution paagi sa People’s Initiative for Charter Change, dako ang mabulig sini sa sektor sang agrikultura, medisina, kag mangin sa internet connectivity.
Dugang pa niya nga nangin kontrobersyal lang ini bangud naga-focus lang ang mga pumuluyo sa isyu nga kabug-usan sang constitution ang islan sa baylo nga ang partikular nga mga probisyon lang.
Nagpasalig man si Garin nga wala sang matabo nga pag-amyendar sa political provision sang constitution nga kun sa diin mahimo mapalawig ang termino sang mga politiko bangud makaguba lang ini sang pagsalig sang mga Pilipino.
