ILOILO CITY- Kanami lang magkaon sa mga restaurants ilabi na kun libre indi bala?
Apang paano kun naanad ka sa libre kag daw ginahingalitan mo na ini?
Ini ang natabo sa isa ka 58-anyos nga lalaki sa Delft City, Netherlands nga nagkaon sang masobra isa ka gatos ka beses sa mga restaurants nga wala sang bayad-bayad.
Ang pinakaulihi diri ang natabo sang damlag lang sang nagkaon ini sa isa ka malahalon nga restaurant kag samtang lapit na lang maubos ang iya kinaon, hinali lang nga nagkurog- kurog ini, nagkiwi ang iya baba nga daw kaangay sang na-stroke rason nga nagpatawag sang paramedics ang tagdumalahan sang restaurant kag sang ila gin-check ang lalaki, naggwa nga wala man sang problema kag didto na natukiban ang iya drama nga isa lang gali ka pakuno-kuno.
Nabuko pa gid ini sa iya modus sang nakilal-an siya sang myembro sang paramedic team nga lain man ang iya ginhatag nga pangalan sang una sang ginrespondehan siya sang nagpakuno-kuno ini nga na-stroke sa lain man nga restaurant.
Sang gin-check naman sa police, nadiskubrehan nga may yara sang kapin 120 na ka reklamo batok sa lalaki bangud sa pagkaon sa restaurant nga wala nagabayad.
Ang problema lang bangud nga apisar may yara sang civil suit batok sa iya, wala gid sang bisan isa ang nakapauntat sa iya modus.
Indi pa maathag kun napreso gid man ini apang isa lang ang sigurado nga madamo na ini sang naintuan bilang isa ka food pirate nga indi mo gid dapat pag-ilugon bangud malain ang magpanginto kag basi kun magpakuno-kuno ka man nga na-stroke, basi madayunan ka ya bala haw.
