Nakumspiskar ang isa ka armas kag P1.4-million nga balor sang iligal nga droga sa duha ka mga gina-alegar durugista kadungan sang bisperas sang kapistahan sa Jaro, Iloilo City.
Sa drug buy bust nga ginpangunahan sang City Drug Enforcement Unit (CDEU) sa Barangay Tabuc Suba sa amo nga distrito, nadakpan sanday alias Ruben sang Barangay Tacas kag alias John Philip sang Barangay Tabuc Suba.
Sa interview sang Bombo Radyo kay Police Lt. Col. Antonio Benitez Jr, head sang CDEU, iya ginpahayag nga nakuhaan ang duha sang 13 ka magagmay nga sachets sang ginapatihan shabu kag duha ka knot-tied sachets nga ginabanta nagabug-at sang 208 gramos, kag may yara man sang 38 caliber revolver.
I-distribute kuntani ang droga sa distrito sang Jaro suno kay Benitez apang natigayon nga mapunggan sang otoridad.
Duha ka semana ang monitoring antes ginpatigayon ang operasyon sang mga pulis.
Sandig sa inisyal nga impormasyon, may daan na nga kaso si alias Ruben nga kaangot man sa paghupot sang iligal nga droga kag explosives sang 2017 apang nakatigayon ini nga makaguwa sa presuhan.
May na-mensyonar na nga source ang duha suno kay Benitez apang iga-check pa sang kapulisan. #
