Sa tunga sang huring-huring sang pag-ilis sang liderato sa Kamara bangud sa gina-alegar paggamit sang ayuda ukon cash subsidy sa pagduso sang people’s initiative para sa charter change ukon cha-cha, nagpaguwa ang Lakas-Christian Muslim Democrats (CMD) majority bloc sang manifesto bilang pagpakita sang suporta kay Speaker Martin Romualdez.
Suno kay House Majority Leader kag Zamboanga City Rep. Mannix Dalipe nga amo man ang executive vice president sang Lakas-CMD, ini nga manifesto ang pirmado sang mga myembro sang partido agud nga suportahan si Romualdez batok sa mga akusasyon nga ginahaboy sa iya.
Sa manifesto, gintawag man nga wala sang basehan ang mga alegasyon batok sa speaker nga naangot sa people’s initiative kag wala man ini naga-reflect sa iya nga matuod nga nature sang serbisyo sa pungsod.
Ang mga nagpirma diri amo ang 91 sa 94 nga myembro sang partido nga amo ang dominant political party sa 311 ka mga mamalidha sa Kamara.
Talalupangdon man nga isa sa nagpirma amo si Pampanga 2nd district Representative kag former president Gloria Macapagal-Arroyo.
Si Arroyo ang ginkakas anay bilang House senior deputy speaker kag ginpapanaog lamang bilang deputy speaker sang Mayo 17, 2023 matapos nga gin-angot man ini sa gina-alegar plano nga kudeta batok sa house speaker.
Suod man ini nga kaalyado ni Vice President Sara Duterte nga subong nagaguwa nga malain man ang relasyon sa speaker.
Nahibaluan sa pagpanguna ni Romualdez, ginaduso sang kadam-an sa Kamara ang cha-cha kag pagkakas sa restrictive economic provisions sang Constitution sa tuyo nga mabuksan pa ang mas daku nga economic potential sang Pilipinas.#
