ILOILO CITY- Ginpakamaayo ni Iloilo City Mayor Jerry Treñas nga sa Energy Regulatory Commission sa baylo nga sa regular court ipasaka ang kaso batok sa National Grid Corporation of the Philippines.
Ini may kaangtanan sa nagluntad nga total blackout sa Western Visayas sang Abril 2023 kag Enero 2024 kun sa diin naglab-ot sa 7 billion pesos ang kapierdehan nga naagom sang syudad kag probinsya sang Iloilo.
Sa interview sang Bombo Radyo kay Trenas, iya ginpahayag nga ang ginkonsiderar nila sa pag-file sang joint complaint sa Energy Regulatory Commission amo nga mas barato ang filing fee kun ipaanggid sa regular court.
Suno kay Treñas, apisar indi mahimo nga mag-award sang mga damages ang Energy Regulatory Commission, apang pwede naman sini nga multuhan ang National Grid Corporation of the Philippines sang maximum nga P50 million.
Nagapati naman ang alkalde nga mabakod ang kaso nga igapasaka batok sa National Grid Corporation of the Philippines bangud nga suportado ini ni Presidente Ferdinand BongBong Marcos Jr., nga una nagpahayag nga dako ang salabton sang amo nga korporasyon sa natabo nga power outage.
