ILOILO CITY- Ka-Bombo, halos tanan siguro sa aton naga-enjoy gid nga magpadulong sa beach ilabi na kun puti ang balas bangud gusto naton nga magpungko- pungko kag maghigda-higda diri.
Apang paano kun ang ginahigdaan mo gali nga sa imo pagdumdom, puti nga balas, mga napudpod nga tul-an gali?
May isa ka beach didto sa Hakodate City, sa Hokkaido Prefecture, sa Japan nga ginbansagan nga ‘Fishbone Beach’ bangud nga halos natabunan ini sang madamol nga layer sang tul-an sang mga isda.
Ang natabo, Disyembre sang nagligad nga tuig, gin-anod pahigad sang baybay ang linibo ka tonelada sang patay nga isda kag ginaangot nila ini sa pag-release sang treated water halin sa Fukushima nuclear plant pakadto sa kadagatan apang ini nga teorya ang ginakontra man sang iban.
Kapin sa 80 percent sang patay nga isda ang sardines kag ang iban amo ang mackerel.
Sa sulod sang pila ka bulan, halos natampukan sang tul-an sang sini nga mga isda ang 1.5 km nga kalabaon sang baybayon.
Sa subong, madamo nga tawo ang nagapadulong diri, apang indi agud magpaligo kundi lantawon ang nasambit nga beach nga kaangay sang graveyard sang mga patay nga isda.
