ILOILO CITY- Ginkumpirma sang Business Permits and Licensing Division nga wala sang record sang application kag wala gid sang business permit ang boarding house kun sa diin na trap ang duha ka napatay nga mga biktima sa sunog nga nagluntad sa San Nicolas, La Paz, Iloilo City.
Sa interview sang Bombo Radyo kay Mr. Norman Tabud, head sang nasambit nga opisina, iya ginpahayag duha lang sa 6 ka mga boarding house nga nasunog ang may permits apang wala pa napang- renew.
Base sa record sang Bureau of Fire Protection, anom ka mga boardinghouse ang naapektuhan sang sunog.
Sa data naman sang Boarding House Commission, sa nasunog nga boarding houses, ang may permit lang apang wala na-renew amo ang ginapanag-iyahan ni Jonalyn Fontiveros nga sang Enero 2023 ulihi nga gin-renew kag ang isa nga ginapanag-iyahan ni Salvacion Lopez nga sang 2004 pa ang ulihi nga renewal.
Ang boarding house naman nga wala sang permit amo ang ginapanag-iyahanan nanday Johna Guadalupe, Arnel Tormon, Julie Pulmunes kag ang boarding house nga napatyan nga nakapangalan kay Vicenta Erasmo.
Ini nga confirmation ang indi lang halin sa Business Permits and Licensing Division kundi pati sa administrative head sang Boarding House Commission nga si Jesusa Mendiola.
Suno kay Mr. Tabud, responsibilidad sang Boarding House Commission ang pag-inspeksyon sang mga business permits sang mga naga-operate nga boarding house sa siyudad kag kun wala sang compliance sa mga requirements, igarekomendar ang closure sang sini nga mga boarding house.
