ILOILO CITY- Mas hugton pa sang Bureau of Fire Protection ang pag- inspect sa mga sleeping accommodations kaangay sang boarding houses sa Iloilo City.
Kasunod ini sang natabo nga sunog sa San Nicolas, La Paz, Iloilo City nga nagbilin sang duha ka mga patay.
Sa interview sang Bombo Radyo kay Fire Superintendent Melanie Habawel, Iloilo City Fire Marshal, iya ginpahayag nga mas istriktuhan nila ang compliance sang mga boarding houses sa nagkalain-lain nga requirements agud mapat-ud ang safety sang mga boarders.
Suno kay Habawel, isa sa requirements amo nga may yara gid dapat sang fire extinguisher sa kada floor kag may yara gid sang fire exit.
Apang pahayag ni Habawel, ang nagakatabo amo nga apisar may yara sang fire extinguisher sa tion sang ila inspection, ginakuha ini ukon ginasaylo-saylo bangud nga portable ini kag kun may matabo nga sunog, indi ini gilayon makit-an.
Dugang niya, importante nga malapit ang fire exit sa mga kwarto agud mahapos makadtuan sa tion sang sunog.
Gintuad naman sang natungdan nga apisar may fire exit sa third floor sang boarding house kun sa diin na-trap ang napatay nga mga boarders, malayo ini sa hulot sang mga biktima.
