ILOILO CITY- Gin-ako sang Panay Energy Development Corporation nga may mga parte sang Unit 3 sang ila planta nga kinahanglan na sang replacement bangud nga may yara na sang mga premature carrier sa ila equipment.
Ini may kaangtanan sa natabo nga power blackout kagab-i sa Panay kag iban nga bahin sang Negros Occidental kun sa diin ang natumod nga rason amo ang pag-shutdown sang Unit 3 kun sa diin naapektuhan man ang Units 1 kag 2.
Sa interview sang Bombo Radyo kay Atty. Antonio Cabalhug Jr.,First Vice President for Panay Site Operations-Panay Energy Development Corporation, iya ginpahayag nga kinahanglan nila sang isa ka opportunity shutdown agud mabayluhan ang nasambit nga mga equipment.
Apang suno sa iya, matigayon lamang ini sa tion nga matapos na ang Cebu- Negros- Panay grid bangud ini ang magasalo sang kinahanglan nga megawatts sa tion nga temporaryo nga ishut-down ang Unit 3 para sa replacement.
Matandaan nga ginpaidalom man sa preventive maintenance ang Unit 3 sang nagligad nga Pebrero.
Handa naman ang Panay Energy Development Corporation nga magtambong sa ginpatawag ni Iloilo City Mayor Jerry Treñas nga pagsinapol sa Lunes.
Ginalauman man nga magtambong ang Department of Energy, Palm Concepcion Power Corporation, Energy Regulatory Commission, kag MORE Electric and Power Corporation.
Imbitahon man suno sa alkalde ang business community kag local government units.
