ILOILO CITY- Ginalantaw sang pamilya sang biktima nga napatay sa pagpangluthang sa Villa Anita, City Proper nga posible nga may kaangtanan sa trabaho ang motibo sa krimen.
Ang biktima amo si Reniel Lazaro, 30, residente sang amo nga lugar.
Sa interview sang Bombo Radyo kay Janille Decolongon, ang live-in partner sang biktima nga isa man sa nakakita mismo sang krimen, iya ginpahayag nga madugay na nga may nabaton nga death threat ang iya bana gikan sa mga tawo nga kaupod man lang sini sa trabaho.
Apang suno kay Decolongon, wala ini makahibalo sang rason kun ngaa nagadumot ang ini nga mga tawo sa iya bana.
Pahayag niya, wala man sang may nasugid nga pangalan kun sin-o ang nagapadala sang death threat sa biktima.
Nahibaluan nga samtang nagapungko ang biktima kaupod ang iya live-in partner kag ang ang isa pa nila nga abyan sa guwa sang tyangge, hinali lang nga may nag-abot nga tawo nga nagpamangkot kay Reniel kun siya si Jemuel Lazaro.
Pagsabat ni Reniel, diretso na ini nga ginluthang sang suspek.
Nakapalagyo pa ini apang ginpasundan pa ang pagpalupok sang pusil.
Nag-agom ang biktima sang pilas sa natuo nga bahin sang dughan, idalom nga porsyon sang likod, kag sa likod sang iya paa.
Gilayon nga nagpalagyo ang mga wala pa natumod nga suspek sakay sa motorsiklo kag sandig sa inisyal nga impormasyon, may isa pa ini ka kaupod sa lain man nga motorsiklo.
Pila sa mga deskripsyon sa suspek amo nga nagasuksok ini sang jacket, naka-bonnet, kag may face mask nga green.
Sa interview naman sang Bombo Radyo kay MaryLuna Roquios, iloy sang biktima, iya ginpahayag nga wala gid ini sang nahibaluan nga may kontra ang iya bata.
Nagapakitluoy ini sa mga tawo nga nagpatay sa iya anak nga makonsensya kag magsungka sa otoridad.
