ILOILO CITY- Nagdeklara na sang state of emergency ang gobernador sang estado sang Maryland, United States of America kasunod sang pag-collapse sang Baltimore bridge matapos nga aksidente nga nabungguan sang isa ka cargo vessel.
Gin-anunsyo ni Maryland Governor Wes Moore ang state of emergency kaangot sa padayon nga pagrescue sa mga tawo nga posible nga na- trap sa sulod sang ila mga nahulog nga salakyan kadungan sang insidente.
Ginpahayag naman sang city fire department nga indi magnubo sa pito ka tawo ang ginapatihan nga nahulog sa Patapsco River kasunod sang pag-collapse sang Francis Scott Key Bridge.
Ginpahayag naman ni Governor Moore nga wala pa sila sang nakit-an nga credible evidence sang terrorist attack.
Sa bahin naman sang Synergy Marine Group, ang manager sang Dali container ship nga nakabunggo sa taytay, wala sang crew sang barko nga napilasan ukon nag-angkon sang injuries.
Gintawag naman ni spokesperson for the Baltimore city fire department, Kevin Cartwright nga isa ka “developing mass-casualty event” ang insidente.
Suno naman kay Bombo Lodi Basco, International Correspondent sa America, isa ka dive team ang gilayon nga gin-deploy sa area.
Base sa inisyal nga imbestigasyon, nadulaan sang kontrol ang crew sa barko tubtob nga nagbunggo sa taytay.
Ang taytay nagalaba sang 1.6 miles (2.6 kilometers) kag nagaserbe nga vital link sa road network sa Baltimore, ang ginbuksan sang 1977 kun sa diin kada tuig, 11 million ka salakyan ang nagatabok diri.
Ang taytay ang ginpangalan kay Francis Scott Key nga isa ka American lawyer, author, kag poet kag amo ang nagsulat sang United States national anthem nga “The Star-Spangled Banner”.
Suno kay Bombo Dee Donasco, international correspondent sa Estados Unidos, ang Port of Baltimore amo ang top handler sa United States sang imports kag exports sang cars and light trucks kag ginakabig ini nga isa sa ” largest economic generators” sa Maryland.
