ILOILO CITY- Ginatun-an pa sang maayo sang Iloilo City Government ang operasyon sang mga motorcycle taxis bilang means of transportation sa syudad.
Sa interview sang Bombo Radyo kay Iloilo City Councilor Sedfrey Cabaluna, chairman sang Committee on Transportation sa City Council, iya ginpahayag nga indi lang dapat basta- basta ang pag-award sang franchise sa mga motorcycle taxis kag kinahanglan ini nga ma- regulate sang maayo.
Suno kay Cabaluna, sa pagkamatuod, may mga stakeholders sa sektor sang transportasyon nga nagpabutyag na sang pagkabalaka nga posible maapektuhan ang ila palangabuhian bangud madamo na sang naga – exist kag nagabyahe nga motorcycle taxis apisar wala pa sila sang prangkisa.
Pahayag ni Cabaluna, kinahanglan ini nga mapungkuan kag mas madiskusyunan sang maayo kaupod ang nagkalain- lain nga sektor nga apektado.
Dugang pa sang konsehal,sa tion nga i- grant gid man ang franchise para sa motorcycles taxis, i-regulate ini sa idalom sang Local Public Transport Route Plan sang syudad agud indi man ang mga ini makapinagusto sa pagbyahe.
Nahibaluan nga ginpauntat ang expansion sang motorcycle taxis kun sa diin ang pilot study sini ang natalana nga magtakop sa Mayo, suno sa Land Transportation, Franchising and Regulatory Board.
Suno sa ahensya, pila sa motorcycle taxi companies nga otorisado sa pag- operate sa idalom sang pilot study amo ang Angkas, JoyRide kag Move It.
Una man nga ginkonsiderar ang pag-expand sang pilot project sa Rizal, Laguna, Cavite, Batangas, Bacolod, Baguio City, Pampanga , kag sa Iloilo.
